უკან

შესყიდვების მონიტორინგისას მნიშვნელოვანია ტენდერში ჩართული კომპანიებისა და მათი მფლობელების შესახებ ინფორმაციის მოგროვება და გადამოწმება. ამისთვის რამდენიმე გზა არსებობს:

მოძებნეთ კომპანიის სახელი (ქართული და ლათინური ასოებით), ტელეფონის ნომერი და მისამართი. გაეცანით კომპანიის შესახებ ინტერნეტ სივრცეში მოძიებულ ინფორმაციას და მოინიშნეთ საგულისხმო ფაქტები/გარემოებები, რაც შესაძლოა გამოგადგეთ საკითხის შესწავლისას.

მოძებნეთ კომპანიის ოფიციალური Facebook გვერდი და შეამოწმეთ ჩვენ შესახებ / About Us-ის განყოფილება.

კომპანიის ვებგვერდი (არსებობის შემთხვევაში) 

სოციალურ ქსელთან ერთად შეამოწმეთ რამდენად აქვთ ოფიციალური ვებგვერდი და გაარკვიეთ არის თუ არა კომპანია ნამდვილი. არსებობის შემთხვევაში, გაეცანით კომპანიის ვებგვერდზე განთავსებულ ინფორმაციას.

ბიზნესის რეესტრი

საჯარო რეესტრის ეროვნული სააგენტოს ვებგვერდიდან გადადით ბიზნესის რეესტრის განყოფილებაში და მოძებნეთ თქვენთვის სასურველი კომპანიის დეტალები როგორც საძიებო სიტყვის, ასევე შემდეგი მონაცემების დახმარებით:

• საიდენტიფიკაციო კოდი ან პირადი ნომერი⁸  (ძიებისას ყველაზე მარტივი გზა);

• კომპანიის დასახელება;

• სამართლებრივი ფორმა;

• ელ-ფოსტა.

კომპანიის მოძებნის შემდეგ გახსენით მისი მონაცემები, სადაც ნახავთ შემდეგ ინფორმაციას / დოკუმენტებს:

• დასახელება;

• საიდენტიფიკაციო კოდი;

• სამართლებრივი ფორმა;

• რეგისტრაციის თარიღი;

• სტატუსი; 

• ამონაწერი მეწარმეთა და არასამეწარმეო იურიდიულ პირთა რეესტრიდან (პირველ რიგში, გახსენით გვერდის ზედა ნაწილში მოთავსებული დოკუმენტი, უახლესი თარიღით, რომელშიც მოცემულია კომპანიის განახლებული მონაცემები, მათ შორის ხელმძღვანელები, მმართველობითი ორგანოს წევრები, პარტნიორები მათი პირადი ნომრის, სახელისა და კომპანიაში მათი კუთვნილი წილის ოდენობის მითითებით - ხელმისაწვდომია PDF ფორმატში); 

• საკუთრების სტატუსთან დაკავშრებით სხვადასხვა სახის ინფორმაცია;

• სუბიექტის რეგისტრირებულ მონაცემებში ცვლილებების რეგისტრაცია.

გაითვალისწინეთ, რომ ზოგიერთი დოკუმენტი .djvu format-ითაა ხელმისაწვდომი, რის გასახსნელადაც djvu reader-ის პროგრამის გადმოწერაა საჭირო.⁹  აუცილებლად შეამოწმეთ ის ფაილები, რომლებიც სათაურში რიცხვებსაც შეიცავს! დოკუმენტებში შესაძლოა ნახოთ შემდეგი ტიპის ინფორმაცია:

• მფლობელების შეხვედრები;

• ინფორმაცია იურიდიული წარმომადგენლების, დირექტორებისა და ზოგიერთ შემთხვევაში, ოფშორული კომპანიების მფლობელების შესახებ;

• კომპანიის წინააღმდეგ სასამართლო გადაწყვეტილებები;

• ინფორმაცია გირავნობის შესახებ;

• მფლობელი სუბიექტის ცვლილების შემთხვევაში, წილის გასხვისების შესახებ ხელშეკრულებაც არის ხოლმე ატვირთული, სადაც როგორც წესი მითითებულია ფასიც.

Companyinfo.ge - ეს ვებგვერდი საჯარო რეესტრის ეროვნული სააგენტოს ბიზნესის რეესტრის ბაზაზე „საერთაშორისო გამჭვირვალობა - საქართველომ” შექმნა. მასზე უფრო გამარტივებულია კომპანიისა და მისი ხელმძღვანელის პირადი ნომრის მოძებნა. ძიება შესაძლებელია როგორც კომპანიის, ასევე, ინდივიდის სახელებით.  

პარტიების შემოწირულობები - სახელმწიფო აუდიტის სამსახურის ვებგვერდზე, პოლიტიკური ფინანსების მონიტორინგის დეპარტამენტის განყოფილებაში მოცემულია ცალკეული პოლიტიკური პარტიებისთვის იურიდიული და ფიზიკური პირებისა მიერ 2012 წლიდან გაწეული შემოწირულობები. ეს გამოგადგებათ კომპანიების პოლიტიკური კავშირების დასადგენად. ძიება შესაძლებელია შემდეგი ტიპის მონაცემების მიხედვით:

• დასახელება ან სახელი და გვარი;

• შემოწირულობის მიმღები (პოლიტიკური პარტია);

• საიდენტიფიკაციო კოდი ან პირადი ნომერი;

• თანხა;

• თარიღი;

• იურიდიული ფორმა (ფიზიკური, იურიდიული ან ორივე);

• შემოწირულობის ტიპი.

პარტიების შემოწირულობები (დაკავშირებული სხვა მონაცემებთან)  - პლატფორმა მომხმარებელს საშუალებას აძლევს, მოიძიოს ინფორმაცია პოლიტიკური პარტიების შემომწირველების ბიზნესინტერესების შესახებ. ამისთვის, პლატფორმა ერთმანეთთან აკავშირებს სხვადასხვა დაწესებულების მიერ გამოქვეყნებულ შემდეგ მონაცემებს: 2012 წლიდან პოლიტიკური პარტიების სასარგებლოდ განხორციელებულ შემოწირულობებს, სახელმწიფო შესყიდვების პლატფორმას და ბიზნეს რეესტრს. მაგ., კომპანიის ძიების შემთხვევაში გიჩვენებთ მის მიერ გაკეთებულ სხვადასხვა შემოწირულობებსა და დეტალურ ინფორმაციას ტენდერებში მონაწილეობის შესახებ. პლატფორმა შექმნილია „საერთაშორისო გამჭვირვალობა - საქართველოს” მიერ.

საგადასახადო გირავნობის/იპოთეკის რეესტრი  - საჯარო რეესტრის ეროვნულ სააგენტოს გამოქვეყნებული აქვს გირავნობის/იპოთეკის რეესტრი, სადაც შეგიძლიათ გადაამოწმოთ არის თუ არა დარეგისტრირებული რომელიმე კომპანიის ან ინდივიდის სახელზე საგადასახადო გირავნობა, იპოთეკა ან სხვა რაიმე სახის ფინანსური სანქცია. ინფორმაცია შეგიძლიათ მოძებნოთ ორი საძიებო სისტემით:

შესაბამისად, აღნიშნულ რეესტრში შეგიძლიათ გადაამოწმოთ, კონკრეტული პიროვნების ან კომპანიის სახელზე რამდენად ირიცხება ყადაღა, აკრძალვა, საგადასახადო გირავნობა/იპოთეკა.

მოვალეთა რეესტრი - საჯარო რეესტრის ეროვნულ სააგენტოს გამოქვეყნებული აქვს იმ კომპანიებისა და პირებისა რეესტრი, რომელთაც დავალიანება აქვთ სახელმწიფოს მიმართ. თუმცა, მოცემულია მხოლოდ მათი სახელი, საიდენტიფიკაციო კოდი / პირადი ნომერი, მისამართი და რეესტრში რეგისტრაციის ნომერი. ხელმისაწვდომი არ არის ინფორმაცია თავად დავალიანების/ვალის შესახებ. შესაბამისად, უბრალოდ გადაამოწმებთ რამდენად აქვს რაიმე ტიპის ფინანსური ვალდებულება ამა თუ იმ კომპანიას/ინდივიდს სახელმწიფოს მიმართ.